Բազում են մեր պետության և հայ հասարակության խնդիրները` պատմամշակութայինից մինչև գիտության զարգացման, բնապահպանության ոլորտներ, հայեցի դաստիարակությունից, կրթությունից մինչև համահայկական հզոր ներուժի միավորում, մեր երիտասարդ սերունդի հոգևոր և ֆիզիկական առողջության ապահովումից մինչև տարբեր քայքայիչ արատավոր երևույթների դեմ պայքար, օրենքի գերակայության հաստատում։ Կարևոր է, որ այս բոլոր խնդիրների և մարտահրավերների դեմ պայքարում կարողանանք միավորվել  ազգովի. սակայն քիչ կարևոր չէ նաև, որ արատավոր երևույթների դեմ համընդհանուր պայքար սկսելուց առաջ արդար լինենք և յուրաքանչյուրս սկսենք մեզնից, լինենք սկզբունքային։ Կան սկզբունքներ, որոնցով պիտի առաջնորդվի մեզնից յուրաքանչյուրը իր առօրյա կյանքում, այսօրինակ սկզբունքների անխախտությունն է մեզ առաջնորդում դեպի հաղթանակ` դարձնում անկոտրում և անկաշառ, վստահ, նպատակասլաց, լավատես և միասնական։

Մեր սկզբունքներն են`

Արդարությունը` որպես հնարավորությունների հավասարություն.

«Ժայռ»-ում բոլորը հավասար են, բոլորն ունեն արտահայտվելու, ինքնակայացման հնարավորություն: Որոշումների ընդունման գործում հաշվի է առնվում բոլորի կարծիքն ու տեսակետը։

Պատասխանատվությունը` որպես առավելությունների և արժանիքների հաստատման միջոց.

Մենք հավատացած ենք, որ մեզնից յուրաքանչյուրն էլ ունի առավելություններ տարաբնույթ հարցերում՝ իր գիտելիքների, կարողությունների, փորձի և կամ ֆիզիկական պատրաստվածության առումով,  սակայն առավելությունները մեզ մեծամտելու առիթ չեն տալիս, այլ հակառակը ստիպում են էլ ավելի պատասխանատու լինել մեր խոսքի, գործի կամ վերաբերմունքի հարցում։

Որքան շատ են առավելություններն` այնքան ավելի մեծ է մեր պատասխանատվությունը շրջապատի նկատմամբ:

Հանդուրժողականությունը` որպես բազմակարծության և զարգացման հիմք.

Երբ չկան մի հարցի վերաբերյալ տարբեր տեսակետներ և մոտեցումներ, ուրեմն այդ հարցի մասին պատկերացումները թերարժեք են։ Միայն խնդիրները, հարցերը տարբեր տեսանկյուններից դիտարկելու դեպքում է հնարավոր գտնել լուծումը։ Կարևոր է հարգել դիմացինի կարծիքը և հանդուրժող լինել դրա նկատմամբ, լսել դիմացինին:

Գիտելիքը և մասնագիտական մոտեցումը` որպես  աշխատանքի որակի և առաջընթացի հիմք.

Ծանոթ-բարեկամ-հարևան մոտեցմամբ աշխատանքի անցնելը և կամ տարաբնույթ հարցերին լուծում տալը այսօր մի շարք խնդիրներ են առաջացրել հայ հասարակության և պետության կայուն զարգացման համար: Այդ իսկ պատճառով գտնում ենք, որ ամեն գործ պետք է վստահել այդ գործի մասնագետին, այլապես ոչ միայն առաջընթաց չի լինի, այլ  կգրանցենք հետընթաց, ինչի ականատեսն ենք այսօր, երբ մեր մի շարք գործարաններ և հիմնարկներ չկան կամ պատշաճ չեն աշխատում:

Հայրենակցականությունը` որպես ազգերի քայքայման և թուլացման հիմք.

Մենք ընդունում ենք միայն մշակութային հայրենակցականությունը, երբ հայ համայնքների կամ գյուղերի, բնակավայրերի տարբերությունները արտացոլվում են մշակութային ստեղծագործություններում, ավանդույթներում կամ արվեստում, և դեմ ենք քաղաքական կամ սոցիալական ոլորտներում հայրենակցական կեղծ մոտեցումների դրսևորումներին: Հայաստանը հայ մարդու հայրենիքն ու տունն է, իսկ այսօրինակ հայրենակցականությունը էլ’ ավելի է սրում  ազգային անհանդուրժողականությունը և խմբային մասնատվածությունը:

Հայաստանը` որպես միասնականության գրավական.

Հայաստանը հայի հայրենիքն է, նրա անկախ գոյատևման, անվտանգ ապագայի երաշխիքը: Այս իսկ պատճառով կարևոր է, որ հայը լինի հայրենակենտրոն և առաջնորդվի հայրենի հողի շենացման, հայրենիքի հզորացման սկզբունքներով: Թե’ հայաստանաբնակները, թե’ սփյուռքի հայերը  մեր հայրենակիցներն են և  Հայաստանի հզորացումը պիտի լինի ցանկացած հայի գործունեության սկզբունքային նախապայմաններից մեկը: